என்ஜினீயரிங் படிப்பு; 20 ஆயிரம் மாணவர்கள் விண்ணப்பம்

பொறியியல் படிப்புகளுக்கான ஆன்லைன் விண்ணப்ப பதிவு தொடங்கிய நிலையில், முதல் நாளில் 20 ஆயிரத்து 97 பேர் விண்ணப்பித்துள்ளனர்.

பிளஸ்-2 பொதுத்தேர்வு முடிவுகள் வெளியான சூழலில், நடப்பாண்டில் பி.இ, பி.டெக், பி.ஆர்க் படிப்புகளில் மாணவர் சேர்க்கைக்கான ஆன்லைன் விண்ணப்பப் பதிவு திங்கட்கிழமை தொடங்கியது.

மாணவ, மாணவிகள் இணையதளம் வாயிலாக விண்ணப்பிக்கலாம் என்றும், அடுத்த மாதம் ஆறாம் தேதி வரை விண்ணப்பிக்க அவகாசம் வழங்கப்படுவதாகவும் தொழில்நுட்பக் கல்வி இயக்ககம் தெரிவித்தது.

அதன்படி www.tneaonline.org அல்லது www.dte.gov.in என்ற இணையதளங்கள் வாயிலாக விண்ணப்பங்களை பதிவு செய்யலாம்.

இணையதளம் வாயிலாக விண்ணப்பிக்க இயலாதவர்கள், மாவட்டங்களில் உள்ள பொறியியல் சேர்க்கை சேவை மையத்தில் விண்ணப்பிக்கலாம் என்றும் கூறப்பட்டுள்ளது.

இந்நிலையில் முதல் நாளில் 20 ஆயிரத்து 97 மாணவர்கள் விண்ணப்பித்துள்ளதாகவும், ஐந்தாயிரத்து 812 பேர் கட்டணம் செலுத்தியதாகவும், ஆயிரத்து 519 மாணவர்களின் சான்றிதழ்கள் பதிவேற்றம் செய்யப்பட்டுள்ளதாகவும் தொழில்நுட்பக் கல்வி இயக்குநரகம் தெரிவித்துள்ளது.