சீனாவில் ஏற்பட்ட நிலநடுக்கம்..!

மக்கள் அனைவரும் நன்றாக உறங்கிக் கொண்டிந்த நேரத்தில் ஏற்பட்ட இந்த நிலநடுக்கத்தின் தாக்கத்தை உணர்ந்த பொது மக்கள் பயத்தில் உறைந்து வீடுகளில் இருந்து ஓடிவந்து வீதிகளில் தஞ்சமடைந்தனர். நிலநடுக்கத்தின் காரணமாக ஏராளமான வீடுகள் உள்பட அடுக்குமாடி கட்டிடங்கள் இடிந்து விழுந்து சேதமடைந்தன.

நிலநடுக்கமானது ரிக்டர் அளவுகோலில் 6.2 ஆக பதிவானதாக புவியியல் ஆய்வு மையம் தெரிவித்துள்ளது. இந்த அதிசக்திவாய்ந்த நிலநடுக்கத்தில் சிக்கி கன்சு மாகணத்தில் 100 பேர் வரை பலியானதாகவும், பலர் படுகாயம் அடைந்துள்ளதாகவும் தகவல் வெளிவந்துள்ளன. அதேபோல கிங்காய் மாகணத்தில் ஹைடோங் நகரத்தில் 11 பேர் வரை உயிரிழந்துள்ளதாகவும் 100 பேருக்கும் மேல் காயமடைந்துள்ளதாகவும் நிலநடுக்க நிவாரண தலைமையகம் தெரிவித்துள்ளது. இதனால் பலி எண்ணிக்கை 111 ஆக உயர்ந்துள்ளது.

நிலநடுக்கம் நடந்த அடுத்த சிறிது நேரத்தில் மீட்பு பணிகள் தொடங்கப்பட்டன. காயமடைந்தவர்கள் உடனடியாக மருத்துவமனைகளுக்கு கொண்டு செல்லப்பட்டனர். இடிபாடுகளில் சிக்கியுள்ளவர்களை மீட்கும் பணி போர்க்கால அடிப்படையில் முடுக்கிவிடப்பட்டுள்ளது. சீனாவின் அவசர மேலாண்மை அமைச்சகத்துடன் தேசிய பேரிடர் மேலாண்மை ஆணையம் இணைந்து நான்காம் நிலை பேரிடர் நிவாரண அவசர நிலையை செயல்படுத்தியுள்ளது.

சீனாவின் லான்சூவிலிருந்து மேற்கு-தென்மேற்கில் 102 கிலோ மீட்டர் தொலைவிலும், 35 கிமீ ஆழத்திலும் மையம் கொண்டு நிலநடுக்கம் ஏற்பட்டுள்ளது. நிலநடுக்கம் காரணமாக அப்பகுதியில் மின்சாரம், குடிநீர் விநியோகம் முற்றிலும் தடை பட்டுள்ளது.

சீனா நிலநடுக்கத்தை அடுத்தடுத்து சந்தித்துக் கொண்டே உள்ளது. கடந்த ஆகஸ்ட் மாதம் சீனாவின் கிழக்கு பகுதியில் ரிக்டர் அளவு 5.4 என்ற அளவு பதிவான நிலநடுக்கத்தில் சிக்கி 23 பேர் படுகாயமடைந்தனர். பல கட்டடங்களும் இடிந்து விழுந்தன. கடந்த 2022ஆம் ஆண்டு சிச்சுவான் மாகாணத்தில் ஏற்பட்ட நிலநடுக்கத்தில் சிக்கி 100 பேர் வரை உயிரிழந்தனர்.

கடந்த 2008ஆம் ஆண்டு ரிக்டர் அளவுகோளில் 7.9 என்ற அளவில் பதிவான அதிசக்திவாய்ந்த நிலநடுக்கத்தால் 87,000 பேர் வரை உயிரிழந்தனர் அல்லது மாயமாகினர் என்று அறிவிக்கப்பட்டது குறிப்பிடத்தக்கது.