பில்கிஸ் பானு வழக்கில் உடனே சரணடைய வேண்டும் !

பில்கிஸ் பானுவை கூட்டு பாலியல் வன்கொடுமை செய்து, அவரது குடும்பத்தினரை கொடூரமாக கொலை செய்து அதிர்ச்சி அளித்தது 2002 குஜராத் கலவரம். இத்தகைய குற்றச் செயலில் ஈடுபட்டவர்களுக்கு தண்டனை வாங்கி தருவதற்கு தனது உயிரையும் பொருட்படுத்தாமல் பல்வேறு அச்சுறுத்தல்களை கடந்து, 10க்கும் மேற்பட்ட வாடகை வீடுகளை மாற்றி, பல்வேறு வழக்கறிஞர்கள் உதவியுடன் தைரியமாக கடந்து வந்துள்ளார் பில்கிஸ் பானு. சிபிஐ விசாரணையின் தொடக்கம் திருப்புமுனையாக மாற வழக்கு குஜராத் மாநிலத்தில் இருந்து மகாராஷ்டிராவிற்கு மாறியது.

இந்த வழக்கில் 11 பேரும் குற்றவாளிகள் என்று உறுதி செய்யப்பட்டு ஆயுள் தண்டனை விதிக்கப்பட்டது. இவர்கள் சிறையில் தண்டனை அனுபவித்து வந்த நிலையில், குஜராத் மாநில அரசு பொது மன்னிப்பு வழங்கி 11 பேரையும் விடுவித்து அதிர்ச்சி அளித்தது. இந்த சம்பவத்தால் நாடே கொந்தளித்தது. ஆனால் பில்கிஸ் பானு மனம் தளரவில்லை. விடாமல் நீதிமன்ற கதவுகளை தட்டினார்.

உச்ச நீதிமன்றத்திற்கு நடையாய் நடந்தார். இதற்கு பலன் கிடைத்தது. கடந்த 8ஆம் தேதி பிறப்பிக்கப்பட்ட உத்தரவில் குற்றவாளிகள் 11 பேரும் அடுத்த இரண்டு வாரத்தில் நீதிமன்றத்தில் வந்து சரணடைய வேண்டும் என்று உத்தரவு பிறப்பித்தது. இந்த தகவல் குற்றவாளிகளின் குடும்பத்தினரை அதிர்ச்சியில் ஆழ்த்தியது. இந்த சூழலில் 2 பேர் மட்டுமே அவர்களது வீட்டில் இருப்பதாகவும், 9 பேர் தலைமறைவாகி விட்டதாகவும் கூறப்பட்டது.

உச்ச நீதிமன்ற விசாரணை

எனவே சலசலப்பு உண்டானது. உச்ச நீதிமன்றம் பிறப்பித்த உத்தரவின்படி பார்த்தால் சரணடைய இன்னும் இரண்டு நாட்கள் மட்டுமே இருக்கின்றன. வரும் 21ஆம் தேதி தான் கடைசி நாள். இதற்கிடையில் குற்றவாளிகள் சார்பில் நீதிமன்றத்தில் மனு தாக்கல் செய்யப்பட்டது. அதில் உடல்நிலை சரியில்லை, மகன், மகளுக்கு திருமணம் இருக்கிறது. விவசாய நிலத்தில் அறுவடை நடைபெறவுள்ளது போன்ற காரணங்களை சுட்டிக் காட்டி சரணடைவதற்கு கூடுதல் கால அவகாசம் கேட்டனர்.

கால அவகாசம் வழங்க முடியாது

ஆனால் நீதிமன்றம் ஏற்கவில்லை. கறாராக சொல்லிவிட்டது. இரண்டு வார கெடு முடிவதற்குள் சரணடைந்து விட வேண்டும் என்று உத்தரவு பிறப்பித்துள்ளது. இதுதொடர்பான உத்தரவை நீதிபதிகள் பி.வி.நாகரத்னா, சஞ்சய் கரோல் ஆகியோர் அடங்கிய அமர்வு பிறப்பித்தது. இந்த உத்தரவு பில்கிஸ் பானு மற்றும் அவரது குடும்பத்தினருக்கு பெரிதும் ஆறுதலை ஏற்படுத்தியுள்ளது.

யார் அந்த 11 பேர்?

பகாபாய் வோஹானியா,
பிபின் சந்திர ஜோஷி,
கேசர்பாய் வோஹானியா,
கோவிந்த் நய்,
ஜஸ்வந்த் நய்,
மிதேஷ் பட்,
பிரதீப் மோர்தியா,
ராதேஷ்யாம் ஷா,
ராஜுபாய் சோனி,
ரமேஷ் சந்தனா,
ஷைலேஷ் பட்