மதிமுக எப்போதும் திமுகவுக்கு அரணாக இருக்கும் !

நாடாளுமன்ற மக்களவை தேர்தல் வரும் மே மாதம் நடைபெற உள்ளது. இதனை முன்னிட்டு அனைத்து மாநில அனைத்து அரசியல் கட்சிகளும் தேர்தல் பணிகளில் தீவிரமாக இறங்கியுள்ளன. தமிழகத்திலும் தேர்தல் பணிகள் சூடுபிடித்துள்ளன. திமுக கூட்டணி கட்சிகள் கட்சி தலைமை அலுவலகமான அறிவாலயத்தில் தொகுதி பங்கீடு குறித்த பேச்சு வார்த்தையில் ஈடுபட்டுள்ளன.

அந்த வகையில் இன்று மதிமுக சார்பில் திமுகவுடன் தொகுதிப் பங்கீடு குறித்து அக்கட்சி நிர்வாகிகள் பேச்சுவார்த்தை நடத்தினர். அப்போது கடந்த முறை போட்டியிட்ட தொகுதிகளைவிடவும் அதிக தொகுதிகளில் போட்டியிட மதிமுக விருப்பம் தெரிவித்துள்ளதாக தகவல் வெளியாகியுள்ளது. மேலும் திருச்சி, விருதுநகர், காஞ்சிபுரம், கடலூர், ஈரோடு, மயிலாடுதுறை ஆகிய தொகுதிகள் அடங்கிய விருப்ப பட்டியலையும் மதிமுக வழங்கியுள்ளது.

மேலும் மதிமுக சார்பில் 2 மக்களவை தொகுதியும் ஒரு மாநிலங்களவை தொகுதியும் கேட்டதாகவும் ஆனால் மதிமுகவுக்கு 3 தொகுதிகளை வழங்க திமுக மறுத்ததாகவும் கூறப்படுகிறது. இந்நிலையில் தொகுதி பங்கீடு குறித்து மதிமுக நிர்வாகிகள் செய்தியாளர்களை சந்தித்தனர். அப்போது பேசிய மதிமுக அவைத் தலைவர் அர்ஜூன் ராஜ், மதிமுகவின் பம்பரம் சின்னத்தில்தான் கண்டிப்பாக போட்டியிடுவோம் என தெரிவித்தார்..

மேலும் 2 மக்களவை தொகுதிகளும் ஒரு மாநிலங்களவை தொகுதியும் ஒதுக்க கேட்டுள்ளதாகவும் தெரிவித்த அவர் கட்சியின் சின்னத்தில் போட்டியிட வேண்டும் என்பதுதான் கட்சயின் நிலைப்பாடு என்றும் கூறினார். இதுகுறித்து திமுக குழுவிடம் கோரிக்கை வைத்துள்ளதாகவும் அர்ஜுன் ராஜ் தெரிவித்துள்ளார்.

முன்னதாக நேற்று செய்தியாளர்களிடம் பேசிய மதிமுக பொதுச்செயலாளர் வைகோ, மதிமுக எப்போதும் திமுகவுக்கு அரணாக இருக்கும் என்றும் கூறினார். மேலும் எந்தெந்த தொகுதிகளை கேட்கலாம் என்பது குறித்து நிர்வாகிகளுடன் கலந்துபேசிதான் முடிவு செய்யப்படும் என்றும், ஆனால் எந்த தொகுதியை ஒதுக்க வேண்டும் என்பதை ஸ்டாலின்தான் முடிவு செய்வார் என்றும் கூறினார்.

இந்த தொகுதிதான் வேண்டும் என்று திமுக தலைமைக்கு எந்த நிர்பந்தமும் மதிமுக கொடுக்காது என்றும் வைகோ தெரிவித்திருந்தார். இந்நிலையில் 6 தொகுதிகளில் போட்டியிட மதிமுக விருப்பம் தெரிவித்து பட்டியலை வழங்கியுள்ளது.