டெஸ்ட் போட்டி ஊக்கத் தொகை 3 மடங்கு உயர்வு!

இந்திய கிரிக்கெட் வீரர்களுக்கான டெஸ்ட் போட்டி ஊக்கத் தொகையை 3 மடங்கு உயர்த்தி உள்ளது பிசிசிஐ.

இந்திய கிரிக்கெட் அணி வீரர்கள் டெஸ்ட் போட்டிக்குமுன்னுரிமை கொடுக்க வேண்டும் என்ற அடிப்படையில் போட்டிக்கான ஊக்கத் தொகையை 3 மடங்கு உயர்த்தி உள்ளது பிசிசிஐ. இதுதொடர்பாக பிசிசிஐ செயலாளர் ஜெய் ஷா தனது எக்ஸ் வலைதள பதிவில்,“டெஸ்ட் கிரிக்கெட்டுக்கான ஊக்கத்தொகை திட்டத்தை அறிவிப்பதில் மகிழ்ச்சியடைகிறேன். நமது வீரர்களின் நிலையான வருவாய்க்காகவும், ஊதிய உயர்வுக்காகவும் இந்தத் திட்டத்தை அமல்படுத்துகிறோம். 2022-23 சீசன் முதல் இந்த திட்டம் அமல்படுத்தப்படும். போட்டி ஊதியத்துடன் இந்த திட்டம் செயல்படுத்தப்படும்” என தெரிவித்துள்ளார்.

இதன்படி உதாரணமாக ஒரு சீசனில் இந்திய அணி 9 டெஸ்ட் போட்டிகளில் விளையாடும் பட்சத்தில் இதில் 4 போட்டிகளுக்கு குறைந்த அளவில் பங்கேற்கும் வீரர்களுக்கு ஊக்கத் தொகை வழங்கப்படாது.

50 சதவீதத்துக்கு மேல் என்ற அளவில் 5 முதல் 6 போட்டிகளில் விளையாடும் வீரர்களுக்கு ஒரு ஆட்டத்துக்கு ரூ.30 லட்சம் ஊக்கத் தொகை வழங்கப்படும். விளையாடும் லெவனில் இடம் பெறாத வீரர்களுக்கு ரூ.15 லட்சம் ஊக்கத் தொகை கிடைக்கும். அதேவேளையில் 7 அல்லது அதற்கு அதிகமான டெஸ்ட் போட்டிகளில் விளையாடும் வீரருக்கு போட்டி ஒன்றுக்கு ரூ.45 லட்சம் ஊக்கத் தொகை வழங்கப்படும். விளையாடும் லெவனில் இடம் பெறாத வீரர் ஊக்கத் தொகையாக ரூ.22.50 லட்சம் பெறுவார்.

இந்த கணக்கீடுகளின்படி கேப்டன் ரோஹித் சர்மா2023-24 சீசனில் இந்திய அணி விளையாடிய 10 டெஸ்ட் போட்டிகளிலும் பங்கேற்றுள்ளார். இந்த வகையில் அவர், ஊதியமாக ஒரு ஆட்டத்துக்கு ரூ.15 லட்சம் என்ற கணக்கில் ரூ.1.50 கோடி பெறுவார். இத்துடன் ஊக்கத்தொகையாக ரோஹித் சர்மாவுக்கு ரூ.4.5 கோடி வழங்கப்படும்.