காலி பாட்டில்களை டாஸ்மாக் கடைகளில் ஒப்படைக்கும் திட்டம்… மாநிலம் முழுவதும் விரிவுப்படுத்த முடிவு!

டாஸ்மாக் கடைகளில் மதுபாட்டில்களைத் திரும்ப பெறும் திட்டம், மாநிலம் முழுவதும் விரிவுபடுத்தப்படும் என தமிழ்நாடு அரசு நீதிமன்றத்தில் தெரிவித்துள்ளது.

தமிழ்நாடு முழுவதும் இயங்கி வரும் டாஸ்மாக் கடைகளில் சேகரிப்படும் காலி பாட்டிகளை மேலாண்மை செய்வது தொடர்பான வழக்கு உயர் நீதிமன்றத்தில் நடைபெற்று வருகிறது. இந்த வழக்கில், நீலகிரி மாவட்டத்தில் மதுபாட்டில்களைத் திரும்ப பெற்றுக்கொண்டு தலா ரூ.10 வழங்க உத்தரவிட்டது.

இதையடுத்து, தமிழ்நாடு அரசு சார்பில் இத்திட்டம் தற்போது நீலகிரி, கோவை, பெரம்பலூர் மாவட்டங்களில் செயல்படுத்தப்பட்டு வருகிறது. இந்த வழக்கு இன்று விசாரணைக்கு வந்தது. அப்போது, தமிழ்நாடு அரசு சார்பில் ஆஜரான வழக்கறிஞர், இந்த தகவலை நீதிமன்றத்தில் தெரிவித்தார்.

மேலும் நாகை, திருவாரூரில் இத்திட்டம் நவம்பர் 15-ம் தேதி முதலும், குமரி, தேனி, தருமபுரியில் டிசம்பர் 1-ம் தேதி முதலும் இத்திட்டத்தை அமல்படுத்த உள்ளதாக தமிழ்நாடு அரசு சார்பில் நீதிமன்றத்தில் தெரிவிக்கப்பட்டது. இதனை ஏற்று வழக்கை நீதிபதி ஒத்திவைத்தார்.