குரூப் 2 தேர்வு முடிவு தேதி அறிவிப்பு!

குரூப் 2 தேர்வு முடிவுகள் டிசம்பரில் வெளியிடப்படும் என தமிழ்நாடு அரசு பணியாளர் தேர்வாணையம் அறிவித்துள்ளது.

குரூப் 2 மற்றும் குரூப் 2ஏ பணிகளுக்கான முதன்மை எழுத்து தேர்வு கடந்த பிப்ரவரி 25-ம் தேதி நடைபெற்றது. கட்டாயத் தமிழ் மொழி தகுதித்தாள் மற்றும் பொது அறிவு ஆகிய பிரிவுகளில் இருந்து கேள்விகள் கேட்கப்பட்டிருந்தன.

இந்த தேர்வை 51 ஆயிரத்திற்கும் அதிகமானவர் எழுதியிருந்தனர். குரூப் 2 தேர்வுக்கான விடைத்தாள்களைத் திருத்தும் பணிகள் தொடங்க சிறிது தாமதமானதாக முன்னதாக தெரிவிக்கப்பட்டது.

இந்த நிலையில் குரூப் 2 தேர்வு முடிவுகள் டிசம்பரில் வெளியாகும் என தமிழ்நாடு அரசு பணியாளர் தேர்வாணையம்(டிஎன்பிஎஸ்சி) தெரிவித்துள்ளது.

நகராட்சி ஆணையர், துணைப்பதிவாளர், இளநிலை வேலைவாய்ப்பு அலுவலர், லஞ்ச ஒழிப்புத்துறை சிறப்பு உதவியாளர், காவல்துறையின் பல்வேறு பிரிவுகளில் உள்ள சிறப்பு நிலை உதவியாளர் உள்ளிட்ட பல்வேறு துறைகளில் காலியாக உள்ள 5,446 பணியிடங்களை நிரப்ப குரூப் 2 தேர்வுகள் நடத்தப்பட்டன. 7 மாதங்களுக்குப் பிறகு தேர்வு முடிவுகள் வெளியாகும் என அறிவிக்கப்பட்டுள்ளது தேர்வர்கள் மத்தியில் மகிழ்ச்சியை ஏற்படுத்தியுள்ளது.