நெஞ்சில் பால்வார்த்த தங்கம்; இன்று விலை குறைவு

சென்னையில் இன்று தங்கம் விலை பவுனுக்கு ரூ.880 குறைந்து, ஒரு பவுன் தங்கம் ரூ.54 ஆயிரத்துக்கு விற்பனை செய்யப்பட்டது. கடந்த ஆண்டு தங்கம் விலை கடுமையாக குறைந்தது, அக்.4-ம் தேதி பவுன் ரூ.42,280 என்றளவில் விற்பனையானது.

இதன் பின்னர் கடந்த டிச.4-ம் தேதி தங்கம் விலை உயர்ந்து பவுன் ரூ.47,800 என்னும் புதிய உச்சத்தை அடைந்தது. பின்னர் கடந்த மார்ச் 28-ம் தேதி ஒரு பவுன் ரூ.50 ஆயிரம் என்ற வரலாறு காணாத உயர்வை எட்டியது.

அதன் பின்னர் தங்கம் விலை தொடர்ந்து உயர்ந்து கொண்டே சென்றது . குறிப்பாக கடந்த 20-ம் தேதி ரூ.55,200 என்னும் புதிய உச்சத்தை அடைந்தது. அன்றைய தினம் வெள்ளி விலையுமே ரூ.100-ஐ கடந்து, ரூ.101 என்ற வரலாறு காணாத உயர்வை எட்டியது.

இதைத் தொடர்ந்து 2 நாட்களும் பவுன் தங்கம் ரூ.54,880 என்ற விலையில் மாற்றமில்லாத நிலையில், வியாழக்கிழமை பவுனுக்கு ரூ.880 குறைந்து ஒரு பவுன் தங்கம் ரூ.54,000 என்ற விலையில் விற்பனையாகிறது.

கிராமுக்கு ரூ.110 குறைந்து ஒரு கிராம் தங்கம் ரூ.6,750-க்கு விற்பனையாகிறது. 24 காரட் சுத்த தங்கம் பவுன் ரூ.57,760-க்கு விற்கப்படுகிறது. வெள்ளி கிராமுக்கு ரூ.3.30 குறைந்து, ஒரு கிராம் ரூ.97 ஆகவும், பார் வெள்ளி ஒரு கிலோ ரூ.97,000-ஆகவும் உள்ளது.