சென்னை சர்வதேச திரைப்பட விழா இன்று தொடக்கம்!

சென்னை சர்வதேச திரைப்பட விழா இன்று தொடங்குகிறது. இதில் என்னென்ன தமிழ் திரைப்படங்கள் திரையிடப்படுகிறது என்பது குறித்தான தகவல் வெளியாகியுள்ளது.

சென்னையில் 21-வது சர்வதேச திரைப்பட விழா இன்று தொடங்குகிறது. இன்று முதல் டிசம்பர் 21-ம் தேதி வரை இந்த விழா நடைபெறுகிறது. இந்த விழாவில் 12 தமிழ் திரைப்படங்களுடன் 57 நாடுகளைச் சேர்ந்த 126 திரைப்படங்கள் திரையிடப்படுகின்றன. ‘இந்தோ சினி அப்ரிசியேஷன் ஃபவுண்டேஷன்’ சார்பில் சென்னையில் ஆண்டுதோறும் இந்தத் திரைப்பட விழா தமிழக அரசு ஒத்துழைப்புடன் நடந்து வருகிறது. இதற்காக இந்த ஆண்டு 85 லட்ச ரூபாய் வரை நிதி ஒதுக்கப்பட்டுள்ளது.

இந்தத் திரைப்பட விழாவில் ‘அநீதி’, ‘அயோத்தி’, ‘கருமேகங்கள் கலைகின்றன’, ‘விடுதலை1’, ‘போர் தொழில்’, ‘மாமன்னன்’, ‘செம்பி’, ‘உடன்பால்’, ‘ராவணக்கோட்டம்’, ‘சாயாவனம்’, ‘வி3’, ‘ஸ்டார்ட் கேமரா ஆக்‌ஷன்’ உள்ளிட்ட 12 தமிழ் திரைப்படங்கள் திரையிடப்பட உள்ளன.

இதில், தேர்வாகும் முதல் மூன்று படங்களுக்கு முதல் பரிசாக ஏழு லட்ச ரூபாய் வழங்கப்படும். இதன் துவக்க நிகழ்ச்சி இன்று மாலை சென்னை சத்யம் திரையங்கில் நடைபெறுகிறது.