லால் சலாம்… வெளியீட்டு தேதி அறிவித்த படக்குழு !

லால் சலாம் திரைப்படம் வரும் பிப்ரவரி மாதம் 9-ம் தேதி வெளியாகும் என படக்குழு அறிவித்துள்ளது.

ரஜினி காந்த் நடிப்பில் நெல்சன் இயக்கத்தில் வௌியான திரைப்படம் ஜெயிலர். வசந்த் ரவி, தமன்னா, சுனில், சிவராஜ்குமார் ஆகியோர் நடிப்பில் வெளியான இப்படத்திற்கு அனிருத் இசை அமைத்திருந்தார்.

சுமார் 600 கோடி ரூபாய்க்கு மேல் வசூலித்து சாதனை படைத்த, இப்படத்தின் வெற்றியைத் தொடர்ந்து ரஜினிகாந்த் நடித்துள்ள படம் லால் சலாம்.

இந்த திரைப்படத்தை ஐஸ்வர்யா ரஜினிகாந்த் இயக்கி உள்ளார். நடிகர் தனுஷ் நடிப்பில் கடந்த 2012-ம் ஆண்டு வெளிவந்த ‘3’ படத்தின் மூலம் தமிழ் சினிமாவில் இயக்குநராக அறிமுகமானவர் தான் ஐஸ்வர்யா ரஜினிகாந்த்.

இதில் சிவகார்த்திகேயன் மற்றும் சுந்தர் ராமு ஆகியோர் முக்கிய வேடங்களில் நடித்திருந்தனர். பள்ளிக்கால காதலை மையமாக கொண்டு எடுக்கப்பட்ட இந்த திரைப்படம் வெளியான போதே அன்றைய இளைஞர்கள் மற்றும் காதலர்கள் மத்தியில் நல்ல வரவேற்பு பெற்று சக்கை போடு போட்டது.

இந்த படத்தின் வெற்றியை தொடர்ந்து 2015-ம் ஆண்டு கௌதம் கார்த்திக் நடிப்பில் வெளிவந்த ”வை ராஜா வை” என்ற படத்தையும் இயக்கினார்.

இந்த நிலையில், லைகா நிறுவனத்தின் தயாரிப்பில் லால் சலாம் என்ற திரைப்படத்தை ஐஸ்வர்யா ரஜினிகாந்த் இயக்கி உள்ளார்.

விஷ்ணு விஷால், விக்ராந்த் இணைந்து நடிக்கும் இப்படத்திற்கு ஏ.ஆர்.ரகுமான் இசையமைத்திருக்கிறார். இத்திரைப்படத்தில் மொய்தீன் பாய் என்கின்ற சிறப்பு கதாபாத்திரத்தில் நடிகர் ரஜினிகாந்த் நடித்துள்ளார்.

கிரிக்கெட் விளையாட்டை மையமாக வைத்து, எடுக்கப்பட்டுள்ள இந்தப் படத்தில் முன்னாள் கிரிக்கெட் வீரர் கபில் தேவ் நடித்துள்ளார்.

இதன் படப்பிடிப்பு மும்பை, சென்னை, புதுச்சேரி, திருவண்ணாமலை, உள்ளிட்ட பகுதிகளில் நடந்து முடிந்தது. படப்பிடிப்பு நிறைவடைந்து, போஸ்ட் புரொடக்‌ஷன் பணிகள் நடைபெற்று வருகின்றன.

லால் சலாம் 2024-ம் ஆண்டு பொங்கலுக்கு வெளியாகும் என அறிவிக்கப்பட்டிருந்த நிலையில், தற்போது படத்தின் வெளியீடு தள்ளிப் வைக்கப்பட்டுள்ளது.

அதன்படி லால் சலாம் படம் வரும் பிப்ரவரி மாதம் 9-ம் தேதி வெளியாகும் என படக்குழு அறிவித்துள்ளது.