வீட்டின் முன் திரண்ட ரசிகர்கள், புத்தாண்டு வாழ்த்துகளைத் தெரிவித்த நடிகர் ரஜினிகாந்த் !

சென்னை போயஸ் கார்டனில் தனது வீட்டின் முன்பு திரண்ட ரசிகர்களுக்கு நடிகர் ரஜினிகாந்த் இன்று புத்தாண்டு வாழ்த்துகளைக் கூறியுள்ளார். நடிகர் ரஜினிகாந்த் வீட்டின் முன்பு அவரது பிறந்தநாள் மற்றும் விசேஷ நாட்களில் ரசிகர்கள் குவிவது வழக்கம்.

அதுபோல புத்தாண்டு தினமான இன்று அவர் வீட்டின் முன்பு வாழ்த்துகளைக் கூற ரசிகர்கள் திரண்டுள்ளனர். இதனையடுத்து ரஜினிகாந்த், வழக்கம் போல ரசிகர்களைப் பார்த்து கையசைத்து வணக்கம் வைத்து மகிழ்ச்சியுடன் தனது புத்தாண்டு வாழ்த்துகளைக் கூறியுள்ளார்.

நடிகர் ரஜினிகாந்த் தற்போது ஞானவேல் இயக்கத்தில் தனது 170வது படமான ‘வேட்டையன்’ படத்தில் நடித்து வருகிறார். கேரளா, திருநெல்வேலி, மும்பை, சென்னை ஆகிய பகுதிகளில் இதன் படப்பிடிப்பு நடந்தது.

இதனையடுத்து, தற்போது மீண்டும் தூத்துக்குடியில் இதன் படப்பிடிப்பு நடந்து வருகிறது. இதற்காக கடந்த வாரத்தில் நடிகர் ரஜினி விமானம் மூலமாக தூத்துக்குடி சென்றடைந்தார். அதன்பிறகு, நடிகர் விஜயகாந்த் மறைந்த செய்தி கேட்டதும் மீண்டும் சென்னைக்கு வந்தவர், நேரில் விஜயகாந்துக்கு அஞ்சலி செலுத்தினார். இப்போது தனது வீட்டில் புத்தாண்டு கொண்டாட்டத்தில் உள்ளார் ரஜினி காந்த்.