மாலத்தீவு அதிபரின் பிடிவாதம்… சிறுவனின் உயிரை பறித்த சோகம் !

மாலத்தீவு அதிபர் முகமது முய்சு இந்தியாவுடன் தொடர்ந்து மோதல் போக்கை கடைப்பிடித்து வருகிறார். சீனாவுடன் நெருக்கம் காட்டி வரும் முகமது முய்சு தொடர்ந்து இந்தியாவுக்கு எதிராகவும் பேசி வருகிறார். சமீபத்தில் பிரதமர் மோடியின் லட்சத்தீவு பயணத்தை மாலத்தீவு அமைச்சர்கள் கடுமையாக விமர்சித்தனர்.

இந்த விவகாரம் பெரும் பூதாகரமானது. இதையடுத்து இந்தியர்கள் மாலத்தீவு பயணத்தை புறக்கணித்து வருகின்றனர். இதனால் சுற்றுலாத்துறையை பெரிதும் நம்பியுள்ள மாலத்தீவு பொருளாதாரம் பெரும் சரிவை சந்தித்துள்ளது. இந்த பிரச்சனைகள் பீக்கில் இருந்தபோதே மாலத்தீவு அதிபர் முகமது முய்சு தனது நெருங்கிய கூட்டாளியான சீனாவுக்கு சென்றார்.

அப்போது சீனா, தமது நாட்டுக்கு அதிக சுற்றுலாப் பயணிகளை அனுப்ப வேண்டும் என கேட்டுக்கொண்டார். மேலும் நாங்கள் சிறிய நாடு என்பதால் எங்களை யாரும் கொடுமைப்படுத்த முடியாது என்றும் இந்திய பெருங்கடல் எந்த ஒரு நாட்டுக்கும் சொந்தம் இல்லை என்றும் இந்தியாவை மறைமுகமாக விமர்சித்தார்.

இதனிடையே மாலத்தீவில் இந்திய ராணுவ வீரர்களை வரும் மார்ச் 15 ஆம் தேதிக்குள் திரும்ப பெற வேண்டும் என்றும் வலியுறுத்தினார். தொடர்ந்து இந்தியாவுக்கு எதிரான போக்கை மேற்கொண்டு வருகிறார் மாலத்தீவு அதிபர். அதிபரின் இந்த நடவடிக்கைக்கு அந்நாட்டு எதிர்க்கட்சிகள் கடும் கண்டனம் தெரிவித்து வருகின்றன. இந்தியா செய்த உதவிகளை மறக்க கூடாது என்றும் அதிபரை பதவி நீக்கம் செய்ய வேண்டும் என்றும் குரல் கொடுத்து வருகின்றன.

இந்நிலையில் மாலத்தீவு அதிபரின் இந்தியா மீதான குரோதம் 14 வயது சிறுவனின் உயிரை பரிதாமாக பறித்துள்ளது. அதாவது இந்தியா மாலத்தீவுக்கு டிரோனியர் ரக விமானத்தை வழங்கியுள்ளது. ஹிந்துஸ்தான் ஏரோநாட்டிக்ஸ் லிமிடெட் (எச்ஏஎல்) தயாரித்து இந்தியாவால் வழங்கப்பட்ட டோர்னியர் விமானம், மனிதாபிமான நோக்கங்களுக்காக மாலத்தீவு நாட்டில் பரவலாகப் பயன்படுத்தப்படுகிறது.

இந்நிலையில் இந்த இந்திய விமானத்தை உடல் நலக்குறைவால் பாதிக்கப்பட்டிருந்த 14 வயது சிறுவன் மருத்துவ சிகிச்சைக்காக பயன்படுத்த அதிபர் முகமது முய்சு அனுமதி மறுத்ததால் சிறுவன் பலியாகியுள்ள சம்பவம் அரங்கேறியுள்ளது. மூளைக்கட்டியால் பாதிக்கப்பட்ட 14 வயது சிறுவனுக்கு கடந்த புதன்கிழமை இரவு பக்கவாதம் ஏற்பட்டுள்ளது.

இதையடுத்து அந்த சிறுவனை மாலேயில் உள்ள மருத்துவமனைக்கு கொண்டு செல்ல விரும்பிய சிறுவனின் பெற்றோர் இந்தியாவின் டிரோனியர் விமானத்தை பயன்படுத்த அதிகாரிகளிடம் அனுமதி கேட்டுள்ளனர். மேலும் அதிபர் முகமது முய்சுவுக்கும் கோரிக்கை விடுக்கப்பட்டுள்ளது. ஆனால் அதிபர் அனுமதி அளிக்கவில்லை என கூறப்படுகிறது.

இதையடுத்து 16 மணிநேரத்திற்கு பின் சிறுவன் விமானம் மூலம் மாலிக்கு கொண்டு செல்லப்பட்டுள்ளார். அங்கு அவருக்கு சிகிச்சை அளிக்கப்பட்ட நிலையில் சிறுவன் சிகிச்சை பலனின்றி உயிரிழந்தார். இந்த சம்பவம் மாலத்தீவு மக்களிடையே பெரும் அதிர்ச்சியை ஏற்படுத்தியுள்ளது. இதுகுறித்து கண்ணீர்மல்க பேசிய சிறுவனின் தந்தை “பக்கவாதம் ஏற்பட்ட உடனேயே அவரை மாலேவுக்கு அழைத்துச் செல்ல நாங்கள் ஐலண்ட் ஏவியேஷன் நிறுவனத்தை அழைத்தோம், ஆனால் அவர்கள் எங்கள் அழைப்புகளுக்கு பதிலளிக்கவில்லை. அவர்கள் வியாழக்கிழமை காலை 8:30 மணிக்கு தொலைபேசியில் பதிலளித்தனர். இது போன்ற நிகழ்வுகளுக்கு ஏர் ஆம்புலன்ஸ் இருப்பதே தீர்வு.” என கூறியுள்ளார்.

இந்த சம்பவம் குறித்து மாலத்தீவு எம்பி மீக்கைல் நசீம் தனது டிவிட்டர் பக்கத்தில் கருத்து தெரிவித்துள்ளார். அதில் “இந்தியா மீதான அதிபரின் குரோதத்தை திருப்திப்படுத்த மக்கள் தங்கள் உயிரைக் கொடுக்க வேண்டியதில்லை” என பதிவிட்டுள்ளார். மாலத்தீவு அதிபரின் இந்த நடவடிக்கைக்கு எதிர்க்கட்சிகள் கடும் கண்டனம் தெரிவித்து வருகின்றன.