பொதுமக்கள் பயமின்றி உச்சநீதிமன்றத்தை அணுகலாம்: தலைமை நீதிபதி!

பொதுமக்கள் உச்ச நீதிமன்றத்தை மக்கள் மன்றமாகத்தான் பார்க்க வேண்டும். அதை அணுக பயப்பட வேண்டியதில்லை என்று உச்ச நீதிமன்ற தலைமை நீதிபதி சந்திரசூட் தெரிவித்துள்ளார்.

அரசமைப்பு சாசனத் தினத்தையொட்டி உச்ச நீதிமன்றத்தில் நேற்று நடைபெற்ற நிகழ்ச்சியில், குடியரசுத் தலைவர் திரவுபதி முர்மு தொடக்க உரை நிகழ்த்தினார், இதில் நீதிபதி சஞ்சய் கிஷன் கவுல் மற்றும் நீதிபதி சஞ்சீவ் கண்ணா, சட்ட அமைச்சர் அர்ஜுன் ராம் மேக்வால் மற்றும் பலர் கலந்து கொண்டனர்.

இதில் கலந்துகொண்டு தலைமை நீதிபதி டி.ஒய்.சந்திரசூட் பேசுகையில், “கடந்த ஏழு தசாப்தங்களில், இந்திய உச்ச நீதிமன்றம் மக்கள் நீதிமன்றமாக செயல்பட்டது. ஆயிரக்கணக்கான குடிமக்கள் இந்த அமைப்பின் மூலம் தங்களுக்கு நீதி கிடைக்கும் என்ற நம்பிக்கையுடன் அதன் கதவுகளை அணுகியுள்ளனர்” என்றார்.

மேலும் அவர் பேசுகையில், “குடிமக்கள் தங்கள் தனிப்பட்ட சுதந்திரத்தைப் பாதுகாப்பதற்கும், சட்டவிரோதக் கைதுகளுக்கு எதிராகப் பொறுப்புக் கூறுவதற்கும், கொத்தடிமைத் தொழிலாளர்களின் உரிமைகளைப் பாதுகாப்பதற்கும், பழங்குடியினர் தங்கள் தாயகத்தைப் பாதுகாக்கவும், சமூகத் தீமைகளைத் தடுக்கவும் நீதிமன்றத்திற்கு வருகிறார்கள்.

நாட்டின் அனைத்து குடிமக்களும் சட்ட அமைப்பில் நம்பிக்கையை நிலைநிறுத்தவும், நீதிமன்றங்களை தங்கள் உரிமைகள் பாதுகாக்கப்படும் ஓர் இடமாக பார்க்கவும் விரும்புகிறார்கள். தனிநபர்கள் உச்சநீதிமன்றங்களுக்குச் செல்வதற்குப் பயப்படவோ அல்லது கடைசி முயற்சியாகக் கருதவோ கூடாது. எங்கள் முயற்சியால், ஒவ்வொரு வகுப்பு, சாதி மற்றும் மதத்தைச் சேர்ந்த குடிமக்களும் நமது நீதிமன்ற அமைப்பு மீது நம்பிக்கை வைத்து, உரிமைகளைச் செயல்படுத்துவதற்கான நியாயமான மற்றும் பயனுள்ள மன்றமாக அதைப் பார்க்க வேண்டும்.” என்றார்.

2022 நவம்பரில் நாட்டின் 50வது தலைமை நீதிபதியாக பதவியேற்ற தலைமை நீதிபதி சந்திரசூட், அடுத்த ஆண்டு நவம்பரில் ஓய்வு பெறும் வரை பதவியில் நீடிப்பார். அவரது பதவிக் காலத்தில், சட்ட அமைப்பை மக்கள் மன்றமாக மாற்ற வேண்டும் என்று தொடர்ந்து வலியுறுத்தி வருகிறார் என்பது குறிப்பிடத்தக்கது.