காவிரி உரிமையை தொலைத்தது யார்… கேள்வியெழுப்பிய தமிழிசை !

திமுக இளைஞர் அணி மாநாடு சேலத்தில் இன்று காலை தொடங்கியது. பிரமாண்டமாக நடைபெறும் இந்த மாநாட்டுக்கான ஏற்பாடுகள் கடந்த சில மாதங்களுக்கு முன்பே தொடங்கி விட்டது. மாநாடு ஏற்பாடு ஒருங்கிணைப்பாளராக நியமிக்கப்பட்டுள்ள அமைச்சர் கே என் நேரு பார்த்து பார்த்து ஒவ்வொரு பணியையும் செய்துள்ளார்.

சேலம் பெத்தநாயக்கன் பாளையத்தில் பிரமாண்ட பந்தல் அமைக்கப்பட்டு லட்சக்ணக்கான இருக்கைகள் அமைக்கப்பட்டுள்ளன. நேற்றே கலை நிகழ்ச்சிகள், ட்ரோன் கண்காட்சிகள் என களைக்கட்ட தொடங்கிவிட்டது. முதல்வர் ஸ்டாலின் தனது குடும்பத்துடன் சென்று மாநாடு ஏற்பாட்டு பணிகளை பார்வையிட்டார்.

தொண்டர்களுக்கு தடல்புடல் விருந்துடன் இன்று காலை திமுக துணை பொதுச்செயலாளர் கனிமொழி, கொடி ஏற்றி வைக்க விமரிசையாக தொடங்கியுள்ளது திமுக இளைஞர் அணி மாநாடு. இந்நிலையில் தெலங்கானா மற்றும் புதுச்சேரி துணை நிலை ஆளுநரான தமிழிசை சவுந்தரராஜன் திமுகவின் இந்த மாநாடு குறித்து தனது சமூக வலைதள பக்கத்தில் சரமாரியாக விமர்சித்துள்ளார்.

தம்பிகளை காண முந்தைய நாளே தனி விமானம் சென்ற முதல்வருக்கு வெள்ளத்தில் தத்தளித்தவர்களை காண செல்ல விமானம் கிடைக்கவில்லையா என கேள்வி எழுப்பியுள்ளார். உரிமைகளைத் தொலைத்தவர்களே இன்று உரிமை மீட்பு மாநாடு நடத்துகிறார்கள் என்றும் வாரிசுகளுக்கே அரியணையா? இவர்களிடமிருந்து நம் உரிமையை மீட்டெடுப்பது யார்? எனவும் தமிழிசை கேள்வி எழுப்பியுள்ளார்.

கரூர் ஆட்டுக்கறி 40 ஆயிரம் கிலோ.. 20 ஆயிரம் கிலோ சிக்கன்.. விடிய விடிய ரெடியான பிரியாணி.. சேலம் திமுக இளைஞர் அணி மாநாடு கமகம மெனு!

இதுகுறித்து அவர் பதிவிட்டுள்ள டிவீட்டில்,

“இளைஞரணி மாநாடாம் ….
பிரம்மாண்ட முன்னேற்பாடாம்….
முந்தைய நாளே முக்கியமானவரின் மேற்பார்வையாம்…

தம்பிகளை காண தனி விமானம் மூலம் சென்ற முக்கியமானவருக்கு….

அன்று முந்தைய நாளே மழைக்கான முன் அறிவிப்பு வந்தும் மக்களைக் காக்க
முன்னேற்பாடு செய்ய செல்வதற்கு தனி விமானம் கிடைக்கவில்லையா?
என்று எங்கோ கேட்கிறது ஒரு குரல்….

இன்று உதயமானவரை முன்னிலைப்படுத்த முந்திச் செல்லும் முக்கியமானவர்….
இதயத்தோடு தத்தளித்தவர்களை காக்க முந்திச் செல்லவில்லையே
ஏன்? என்று கேட்கிறது அதே குரல்….

இது ஆள்பவர்களுக்கு தகுதியா என்று கேட்டால்?
ஆளுநர்களுக்கு தகுதி இல்லை என்பார்கள்….

ஆனால் ஜனநாயகத்தில்
ஆளாளுக்கும் கேள்வி கேட்கும் தகுதி இருக்கிறது என்று உரக்கச் சொல்கிறது அதே குரல்…

உரிமை மீட்பு மாநாடாம்?

காவிரி உரிமையை தொலைத்தது யார்?

கச்சத்தீவை தாரைவார்த்தது யார்?

ஜல்லிக்கட்டு உரிமையை இழந்தது யார்?

கல்வி உரிமையை பறிகொடுத்தது யார்?

நீட் தேர்வு வர ஆரம்பித்தது யார் காலத்தில்?

உரிமைகளைத் தொலைத்தவர்களே இன்று உரிமை மீட்பு மாநாடு நடத்துகிறார்களாம்..

வாரிசுகளுக்கே அரியணையா?

இவர்களிடமிருந்து நம் உரிமையை மீட்டெடுப்பது யார்?
(தி)க்கு (மு)க்காடும் (க)ண்மணிகள்….” என குறிப்பிட்டுள்ளார் தமிழிசை சவுந்தரராஜன்.