மருத்துவமனையில் இருந்து வீடு திரும்பினார் விஜயகாந்த்..

உடல் நலக்குறைவால் மருத்துவமனையில் சிகிச்சை பெற்று வந்த தே.மு.தி.க., தலைவர் விஜயகாந்த் இன்று மருத்துவமனையில் இருந்து டிஸ்சார்ஜ் ஆகியுள்ளார். உடல்நலம் சீரானதை தொடர்ந்து விஜயகாந்த் இன்று வீடு திரும்பியுள்ளார்.

நடிகரும் தேமுதிக கட்சியின் தலைவருமான விஜயகாந்த், நவம்பர் 18ஆம் தேதி உடல் நலக்குறைவு காரணமாக தனியார் மருத்துவமனையில் அனுமதிக்கப்பட்டிருந்தார். சளி காய்ச்சல் மற்றும் இருமல் காரணமாக விஜயகாந்த் மருத்துவமனையில் அனுமதிக்கப்பட்டார். வழக்கமான பரிசோதனைக்காகதான் விஜயகாந்த் மருத்துவமனையில் அனுமதிக்கப்பட்டுள்ளதாக முதலில் தகவல் வெளியானது.

மருத்துவமனை அறிக்கை

ஆனால் கடந்த வாரம் மருத்துவமனை தரப்பில் வெளியிடப்பட்ட அறிக்கை ஒட்டுமொத்த தேமுதிக தொண்டர்களையும் ரசிகர்களையும் கவலை அடைய செய்தது. விஜயகாந்தின் உடல்நிலை சீராக இல்லை என்றும் அவருக்கு நுரையீரல் சிகிச்சைக்கான உதவி தேவைப்படுவதாகவும் தெரிவித்தது. அதுமட்டுமின்றி மேலும் 14 நாட்களுக்கு விஜயகாந்துக்கு மருத்துவமனையிலேயே சிகிச்சை அளிக்கப்பட வேண்டும் என்றும் மருத்துவமனை அறிக்கை தெரிவித்தது.

கோவில்களில்சிறப்பு வழிபாடு

விஜயகாந்தின் உடல்நிலை குறித்த இந்த அறிக்கை தமிழக அரசியல் வட்டாரத்திலும் கலக்கத்தை ஏற்படுத்தியது. இததையடுத்து தேமுதிக தொண்டர்களும் ரசிகர்களும் விஜயகாந்த் விரைவில் பூரண நலம் பெற்று வீடு திரும்ப வேண்டும் என தெரிவித்து வந்தனர். அரசியல் கட்சி தலைவர்களும் விஜயகாந்த் விரைவில் நலம் பெற வேண்டும் என வாழ்த்து தெரிவித்து வந்தனர். தமிழ்நாடு முழுக்க பல்வேறு பகுதிகளில் விஜயகாந்த் குணமடைய வேண்டி தொண்டர்களும் ரசிகர்களும் கோவில்களில் சிறப்பு வழிபாடு நடத்தி வந்தனர்.

வதந்திகளை மறுத்த பிரேமலதா

இதனிடையே விஜயகாந்திற்கு ட்ரக்கியாஸ்டமி சிகிச்சை அளிக்கப்படுவதாகவும், அவருக்கு வெண்டிலேட்டர் சப்போர்ட் அளிக்கப்படுவதாகவும் தகவல்கள் வெளியாயின. ஆனால் விஜயகாந்தின் மனைவியும் தேமுதிக பொருளாளருமான பிரேமலதா, இதனை மறுத்தார். விஜயகாந்தின் உடல்நிலை குறித்து பரவும் வதந்திகளை நம்ப வேண்டாம் என்றும் கேட்டுக்கொண்டார். மேலும் விஜயகாந்த் மருத்துவமனையில் சிகிச்சை பெறும் போட்டோக்களையும் வெளியிட்டார்.

வீடு திரும்பினார் விஜயகாந்த்

இந்நிலையில் தேமுதிக தலைவர் விஜயகாந்துக்கு உடல் நலம் தேறியுள்ள நிலையில் மருத்துவமனையில் இருந்து இன்னும் ஓரிரு நாட்களில் டிஸ்சார்ஜ் செய்யப்படுவார் என தகவல் வெளியானது. ஆனால் இன்றே விஜயகாந்த் டிஸ்சார்ஜ் செய்யப்பட்டுள்ளார். அவரது உடல் சீரனாதை தொடர்ந்து சென்னை மியாட் மருத்துவமனையில் இருந்து விஜயகாந்த் இன்று வீடு திரும்பியுள்ளார். விஜயகாந்த் வீடு திரும்பிய தகவலால் தேமுதிக தொண்டர்களும் ரசிகர்களும் மகிழ்ச்சி அடைந்துள்ளனர்.