மாணவர்கள் வேறு கல்லூரிகளில் சேர்க்கப்படுவார்கள்.. அண்ணா பல்கலைக்கழகம் !

இந்தியாவிலேயே பொறியியல் கல்விக்கான மிகப்பெரிய பல்கலைக்கழகங்களில் ஒன்றாக அண்ணா பல்கலைக்கழகம் விளங்குகிறது.

அண்ணா பல்கலைக்கழகத்துக்கு கீழ் சுமார் 570-க்கும் மேற்பட்ட பொறியியல் கல்லூரிகள் இணைக்கப்பட்டுள்ளன. இவ்வாறு இணைக்கப்பட்ட கல்லூரிகள் அண்ணா பல்கலைக்கழகம் நிர்ணயிக்கும் பல தகுதிகளை பெற்றிருக்க வேண்டும். திறமையான பேராசிரியர்கள், அனைத்து வசதிகளையும் கொண்ட ஆய்வகங்கள், மாணவர் சேர்க்கை, கற்பிக்கும் தரம், உள்கட்டமைப்பு வசதி உள்ளிட்ட பல தரங்களை அக்கல்லூரிகள் கடைப்பிடிக்க வேண்டும்.

அவ்வாறு இல்லாத கல்லூரிகளை தனது இணைப்புக் கல்லூரி அங்கீகாரத்தில் இருந்து அண்ணா பல்கலைக்கழகம் ரத்து செய்துவிடும். அந்த வகையில், நடப்பாண்டு நடைபெற்ற பொறியியல் கல்லூரிகளுக்கான மாணவர் சேர்க்கை கலந்தாய்வில் 442 கல்லூரிகளில் உள்ள 2 லட்சத்து 19 ஆயிரத்து 346 இடங்களுக்கு ஒற்றை சாளர முறையில் 1 லட்சத்து 60 ஆயிரத்து 780 விண்ணப்பங்கள் பெறப்பட்டன. இதில் 80,951 மாணவர்கள் பொதுப்பிரிவிலும், 7 8,475 மாணவர்கள் 7.5 சதவீத அரசு உள் ஒதுக்கீட்டின் கீழ் சேரவும் அனுமதி வழங்கப்பட்டது.

இந்த சூழலில், அண்ணா பல்கலைக்கழத்துடன் இணைப்பு பெற்ற 75 கல்லூரிகளில் மிக மிக சொற்ப அளவிலேயே மாணவர்கள் சேர்க்கை நடந்திருப்பதாக தெரிகிறது. குறிப்பாக, சில கல்லூரிகளில் ஒற்றை இலக்கத்திலேயே மாணவர் சேர்க்கை நடந்திருக்கிறது. இதனால் அதிருப்தி அடைந்துள்ள அண்ணா பல்கலைக்கழகம், இதுபோன்ற கல்லூரிகளில் சேர்ந்துள்ள மாணவர்களை வேறு கல்லூரிகளில் சேர்க்கப்படுவார்கள் என்றும், மேலும் அந்தக் கல்லூரிகளின் இணைப்பு அங்கீகாரத்தை ரத்து செய்வது குறித்தும் நடவடிக்கை எடுக்கப்படும் எனவும் எச்சரித்துள்ளது. அண்ணா பல்கலைக்கழக துணைவேந்தர் வேல்ராஜ் இதனை தெரிவித்திருக்கிறார்.