ஸ்ரீரங்கத்தில் பிரதமர் மோடி !

பிரதமர் நரேந்திர மோடி மூன்று நாள் பயணமாக தமிழகம் வந்துள்ளார். சென்னை நேரு உள்விளையாட்டு அரங்கில் நேற்று நடைபெற்ற கேலோ இந்தியா போட்டி தொடக்க விழாவில் கலந்துகொண்டு போட்டிகளை தொடங்கிவைத்தார். மேலும் புதுப் பொலிவுடன் மேம்படுத்தப்பட்டுள்ள டிடி தமிழ் தொலைக்காட்சியின் சேவையையும் தொடங்கி வைத்தார்.

அப்போது பேசிய பிரதமர் மோடி, இந்தியாவின் விளையாட்டு வளர்ச்சியில் தமிழகத்திற்கு என தனி இடமுண்டு என்றும், எத்தனையோ விளையாட்டு வீரர்கள் தமிழகத்தில் இருந்து உருவாகியுள்ளதாகவும், இது சாம்பியன்களின் பூமி என்றும் தெரிவித்தார்.

இதனைத் தொடர்ந்து கிண்டி ராஜ்பவனில் நேற்று இரவு தங்கிய பிரதமர், இன்று காலை விமானம் மூலமாக திருச்சி புறப்பட்டுச் சென்றார். திருச்சி விமான நிலையத்தில் இருந்து ஹெலிகாப்டர் மூலம் ஸ்ரீரங்கம் கொள்ளிடம் பகுதியில் அமைக்கப்பட்டு இருந்த தற்காலிக ஹெலிபேட்டில் வந்து இறங்கினார். அங்கிருந்து சாலை மார்கமாக கார் மூலமாக ஸ்ரீரங்கம் ரங்கநாதர் கோயிலை வந்தடைந்தார்.

சாலையின் இரு புறங்களும் பாஜகவினரும், பொதுமக்களும் திரளாக நின்று பிரதமர் மோடிக்கு மலர்த்தூவி வரவேற்பு அளித்தனர். பிரதமர் மோடியை வரவேற்று இந்தி மற்றும் தமிழில் பேனர்களும் வைக்கப்பட்டு இருந்தன. மக்களை பார்த்த பிரதமர் காரில் ஏறி நின்றபடி அவர்களுக்கு கையசைத்து தன்னுடைய மகிழ்ச்சியை பகிர்ந்து கொண்டார்.

இதனைத் தொடர்ந்து ஸ்ரீரங்கம் ரங்கநாதர் கோயிலில் சாமி தரிசனம் செய்வதற்காக சென்றார். அவருக்கு புரோகிதர்கள் பூரண கும்ப மரியாதையுடன் வரவேற்பு அளித்தனர். வேட்டி மற்றும் சால்வை அணிந்து கோயிலுக்குள் சென்ற பிரதமர் காயத்ரி மண்டபத்தில் நின்று ரெங்கநாதரை வழிபாடு செய்தார்.

ராமானூஜர், சக்கரத்தாழ்வார், கருடாழ்வார் சன்னதியிலும் வழிபாடு நடத்தினார். ஸ்ரீரங்கம் கோயில் யானை ஆண்டாளிடமும் ஆசிர்வாதம் பெற்றார். அப்போது, பிரதமரை வரவேற்கும் வகையில் ஆண்டாள் யானை மவுத் ஆர்கன் வசித்தது. யானையை பிரதமர் மோடி தடவிக்கொடுத்தார். இதனைத் தொடர்ந்து பிரதமருக்கு பிரசாதங்களை வழங்கிய புரோகிதர்கள் ஜடாரி வைத்து ஆசிர்வாதம் செய்யப்பட்டது.

இதனைத் தொடர்ந்து அங்கிருந்து ஹெலிகாப்டர் மூலமாக சென்று பிற்பகல் 2 மணியளவில் ராமேஸ்வரத்தை அடைகிறார். அங்கிருந்து கார் மூலமாக ராமேஸ்வரம் ராமநாத சுவாமி கோயிலுக்கு செல்லும் அவர், அக்னி தீர்த்த கடலில் புனித நீராடுகிறார். இன்று முழுவதும் ஆன்மீக நிகழ்வுகளில் பங்கேற்கும் பிரதமர், இரவு ராமகிருஷ்ண மடத்தில் தங்குகிறார்.

நாளை காலை கார் மூலமாக தனுஷ்கோடி அரிச்சல் முனை பகுதிக்கு செல்லும் அவர் கோதண்டராமர் கோயிலில் வழிபாடு நடத்துகிறார். பின்னர் கார் மூலமாக ராமேஸ்வரம் திரும்பி, அங்கிருந்து ஹெலிகாப்டர் மூலம் மதுரை விமான நிலையம் செல்கிறார்கள். அங்கிருந்து பகல் 12.35 மணியளவில் விமானம் மூலம் டெல்லி புறப்பட்டுச் செல்கிறார்.