அண்ணாவின் 115வது பிறந்த நாள்…அமைச்சர் உதயநிதி ஸ்டாலின் மரியாதை !

முன்னாள் முதல்வர் அறிஞர் அண்ணாவின் பிறந்த நாளை முன்னிட்டு சென்னை அண்ணா அறிவாலயத்தில் உள்ள அவரது உருவச்சிலைக்கு அமைச்சர் உதயநிதி ஸ்டாலின் மரியாதை செலுத்தினார்.

பேரறிஞர் அண்ணாவின் 115வது பிறந்த நாள் இன்று கொண்டாடப்படுகிறது. இதனை முன்னிட்டு தமிழக அரசின் சார்பில் பல்வேறு வகையில் கொண்டாட்டங்கள் ஏற்பாடு செய்யப்பட்டுள்ளன. கலைஞர் மகளிர் உரிமைத்தொகை திட்டம் அண்ணா பிறந்த நாளை முன்னிட்டு இன்று தொடங்கி வைக்கப்பட்டுள்ளது.

இந்த திட்டத்தை முதல்வர் மு.க..ஸ்டாலின் காஞ்சிபுரத்தில் இன்று தொடங்கி வைத்தார். அதற்காக அவர் காஞ்சிபுரம் சென்றுள்ள நிலையில் அங்குள்ள அண்ணாவின் நினைவிடத்திற்கு நேரில் சென்று அவர் மரியாதை செலுத்தினார்.

அண்ணா பிறந்தநாளை முன்னிட்டு சென்னையில் அண்ணா அறிவாலயத்தில் உள்ள அண்ணா சிலைக்கு அமைச்சர் உதயநிதி ஸ்டாலின் சக அமைச்சர்களுடன் வந்து மலர் தூவி மரியாதை செலுத்தினார். அங்கு வைக்கப்பட்டிருந்த அண்ணா புகைப்படத்திற்கு மாலை அணிவித்து அவர் மரியாதை செலுத்தினார்.

அவருடன் முன்னாள் மத்திய அமைச்சர் டி.ஆர்.பாலு, நாடாளுமன்ற உறுப்பினர் ஆர்.எஸ்.பாரதி உள்ளிட்ட பலரும் கலந்து கொண்டனர். இதற்காக வருகை தந்த உதயநிதிக்கு திமுகவினர் ஏராளமாக திரண்டு வந்து வரவேற்பு அளித்தனர்.