முக்கோண காதல் கதையில் அசோக் செல்வன் !

2013ல் சூது கவ்வும் படத்தின் மூலமாக தமிழ் சினிமாவில் அறிமுகமானவர் அசோக் செல்வன். அந்த படத்தை தொடர்ந்த பீட்சா 2, தெகிடி, சவாலே சமாளி, கூட்டத்தில் ஒருவன் என எக்கச்சக்கமான படங்களில் இவர் நடித்திருக்கிறார்.

2020ல் இயக்குனர் அஸ்வத் மாரிமுத்து இயக்கத்தில் வெளியான ஓ மை கடவுளை படத்தில் ஹீரோவாக நடித்த ரசிகர்கள் மத்தியில் தனி கவனத்தை இவர் ஈர்த்தார். அதன்பிறகு தொடர்ந்து இவர் நடித்த அனைத்து படங்களிலுமே இவருக்கு நல்ல வரவேற்பு மற்றும் ஆதரவு கிடைத்தது.

அசோக் செல்வனின் சமீபத்திய திரைப்படங்களான போர் தொழில், சபா நாயகன் மற்றும் ப்ளூ ஸ்டார் மக்கள் மத்தியில் பேராதரவை பெற்றிருந்தது. இந்த படங்களுக்கு ரசிகர்கள் மத்தியில் நல்ல வரவேற்பு கிடைத்தது. இதன் மூலம் அவருக்கும் தமிழ் சினிமாவில் மிகப்பெரிய ஓபன்னிங் உருவாகி இருக்கிறது.

தற்போது அசோக்செல்வன் கமிட்டாகி இருக்கும் புதிய படம் குறித்த தகவல் வெளியாகியுள்ளது… 2005ல் வெளியான கண்ட நாள் முதல் படத்தை இயக்கி இயக்குனராக அறிமுகமானவர் பிரியா.வி. இவர் இயக்கவிருக்கும் இந்த புதிய படத்தில்தான் அசோக் செல்வன் ஹீரோவாக நடிக்கிறார். இயக்குனர் பிரியா கண்ணாமூச்சி ஏனடா, ஹீரோவா? ஸிரோவா? ,ஆனந்தம் ஆகிய படங்களை இயக்கியிருக்கிறார் என்பது குறிப்பிடத்தக்கது.

முக்கோண காதல் கதையாக உருவாகவிருக்கும் இந்த படத்தில் பொன்னியின் செல்வன், கட்டா குஸ்தி ஆகிய படங்களில் நடித்த ஐஸ்வர்யா லட்சுமி கதாநாயகியாக நடிக்கிறார். இவர் தற்போது இயக்குனர் மணிரத்னம் இயக்கத்தில் உலகநாயகன் கமல்ஹாசனின் தக் லைஃப் படத்தில் நடித்து வருகிறார் என்பது குறிப்பிடத்தக்கது.

அதேபோல, இயக்குனர் நெல்சன் திலீப்குமார் இயக்கத்தில் சூப்பர்ஸ்டார் ரஜினியின் ஜெயிலர் படத்தில் அவருக்கு மகனாக நடித்த நடிகர் வசந்த ரவி இந்த முக்கோண காதல் கதை படத்தில் முக்கிய கதாபாத்திரத்தில் இணைந்திருக்கிறார்.

இந்த புதிய படத்திற்கு இசையமைப்பாளர் யுவன் சங்கர் ராஜா இசையமைக்கிறார் என்பதும் குறிப்பிடத்தக்கது. இந்த புதிய கதைக்கு பொன் ஒன்று கண்டேன் என பெயர் வைக்கவிருப்பதாகவும் தகவல் வெளியாகி உள்ளது. எனினும் இது குறித்த அதிகாரப்பூர்வ தகவல் வெளியாகும் வரை காத்திருக்கலாம்.